රට වෙනුවෙන් දිවිපිදූ ප්‍රථම රණවිරුවරිය

ලක් වනිතාව කවදත් එඩිතරය. ගැහැනිය ගෙයි මුල්ලට කර තිබූ යුගය නිමා කරමින් ඇය පිරිමින් හා කරට කර සිටින තත්ත්වයට ආවේ අද ඊයෙක නොවේ. එදා ගේ දොර බලා කියා ගනිමින් දරු මල්ලන් හදා වඩා ගනිමින් කල් ගෙවූ වනිතාව පසු කාලයේදී මුළු මහත් සමාජයම යහ මඟට ගනිමින් රට කරවන තත්ත්වයට ද පත්වූවා ය. අනුලා බිසව, සෝමාවතී දේවිය සහ විහාර මහා දේවිය යුගයෙන් යුගයට රට දැය වෙනුවෙන් පෙරට ආ එවන් කතුන් අතර විශේෂය.

වත්මනෙහි රටේ පවතින කුරිරු යුද්ධය නිසා රට දැය වෙනුවෙන් දිවිපිදූ වීරයන් අතරට වීරවරියන් ද එක්ව සිටීම මුළුමහත් වනිතා පරපුරට ම ආඩම්බරයකි. අප මේ කතා කරනුයේ ද එවන් වීරවරියක් පිළිබඳව ය. රට වෙනුවෙන් දිවිපිදූ ප‍්‍රථම වීරවරිය ලෙස ඇය ඉතිහාස ගතවන්නීය.

ඇය ඉරේෂා නිල්මිණි ද සිල්වා මෙනවියයි. යාපනය ප‍්‍රදේශයේදී ඇය රට වෙනුවෙන් දිවිපිදුවා ය. එල්.ටී.ටී.ඊ. ක්ලේමෝ බෝම්බ ප‍්‍රහාරයකින් මිය යද්දී ඇය යුද හමුදා පොලිස් කණ්ඩායමේ කෝප‍්‍රල්වරියක වූවා ය. එම ප‍්‍රහාරයෙන් ඇගේ සිරුර හඳුනාගත නොහැකි තරමට සුනු විසුණු වූයේය. ‘පූර්ණ භූමි’ හා ‘දේශපුත‍්‍ර’ සම්මානයෙන් පුද ලද කෝප‍්‍රල් ඉරේෂා නිල්මිණි යුද හමුදා පොලිස් හා යුද හමුදා නිත්‍ය බලකායේ ප‍්‍රථමයෙන් දිවිපිදූ නිත්‍ය රණවිරුවරිය ලෙස යුද හමුදා ඉතිහාසයට එක් වන්නීය.

ඇය පිළිබඳ 10 වැනි ගුණ සමරුව පසුගිය ජනවාරි 2 වැනි දින ඇගේ නිවසවූ, ශ‍්‍රී ජයවර්ධනපුර ඇතුළු කෝට්ටේ ‘ඉරේෂා නිල්මිණි’ නිවසේ දී යුදහමුදා නිලධාරීන් හා නිලධාරිනියන් පිරිසකගේ සහභාගිත්වයෙන් සිදු කැරිණි.

1974.05.02 වැනි දින උපත ලද ඇය, නුගේගොඩ ශාන්ත ජෝශප් බාලිකා විද්‍යාලයෙන් අධ්‍යාපනය ලබා 1992 අපොස සාමාන්‍ය පෙළ විභාගයෙන් වාණිජ අංශයෙන් උසස් ලෙස සමත් වූවා ය.

සිංගප්පූර් ගුවන් සේවය ඔබ්සර්වර් පුවත්පත හා ලේක්හවුස් ආයතනය 1992 දී සංවිධානය කරන ලද මිස් ශ‍්‍රී ලංකා වර්ල්ඩ් 92’ රූප සුන්දරී තරගයට ඉදිරිපත් වී අවසන් නිරූපිකාවන් 15 දෙනා අතරට ද ඉරේෂා ඇතුළත් වූවා ය.

නාරාහේන්පිට ආසිරි රෝහලේ අමුත්තන් පිළිගන්නිය වශයෙන් 1994 දී සේවයට බැඳී සිටියදී ප‍්‍රතිකාර ලබාගැනීමට පැමිණෙන යුද හමුදා පොලිස් කාන්තාවන් සමඟ මිත‍්‍ර වූ ඉරේෂා පසුව හමුදා සේවයට එක් වූවා ය.

යුද හමුදා පොලිස් කාන්තා සේවාවට 1994 ඔක්. 28 දා ඇතුළත් වූ ඇය, 1994 දෙසැම්බර් 27 වැනි දින පළමු වන ශ‍්‍රී ලංකා යුද හමුදා කාන්තා බළකායේ 15 වැනි පුහුණුවීම් බළකායේ ආධුනික සෙබළ 58860 නිල අංකය යටතේ හමුදා පුහුණුව ලැබුවා ය.

ලාන්ස් කෝප‍්‍රල් තනතුරක් සඳහා 1995 මාර්තු 8 වැනි දින උසස් කරනු ලැබූ ඉරේෂා යුද හමුදා පොලිසියේ 39 වැනි විනයාරක්ෂක රෙජිමේන්තුවට ඇතුළත් වී 1995 මාර්තු මස සිට 1995 ජූනි මස 2 වැනි දින දක්වා යුද හමුදා පොලිස් පුහුණුවත් ලැබුවා ය.

සිරිමාවෝ බණ්ඩාරනායක අගමැතිනියගේ ප‍්‍රධානත්වයෙන් 1995 අපෙ‍්‍ර්ල් 14 දා කොළඹ යුද හමුදා කී‍්‍රඩා පිටියේ පැවැති යුද හමුදා අවුරුදු කුමාරි තරගයෙන් ද ඉරේෂා තෙවැනි ස්ථානය ලැබුවා ය. තිස් අට වන යුද හමුදා පොලිස් බළකායට ඇතුළත් ව පලාලි අනුරාධපුර කන්කසන්තුරේ යන පළාත්වල 1995.8.14 දින දක්වා සේවය කර 1996 දෙසැම්බර් 24 දින දක්වා යුද හමුදා පොලිස් මූලස්ථානයට අනුයුක්තව ඇය සේවය කර ඇත.

එවකට යුද හමුදාපතිව සිටි රොහාන් දලුවත්ත මහතාගේ කාර්යාලයේ පිළිගැනීමේ නිලධාරිය ලෙස ද සේවය කරමින් සිටියදී 1996.12.25 සිට 1997.12.26 දින දක්වා යාපනයේ මෙහෙයුම් රාජකාරි යෑමට ඇයට නියෝගයක් ලැබිණි. ඇය මියයෑමට පෙර දින එනම් වර්ෂ 1997 ජනවාරි 1 වැනි දින පලාලිහි දී ඇගේ දින පොතේ, තමාටම ‘සුබ නව වසරක්’ යනුවෙන් සටහන්කර තිබූ අයුරු අපට දක්නට ලැබුණි.